காதலில் காத்திருத்தல் சுகமா? தவமா?.....

காத்திருத்தல் சுகம்

என்றார்கள் காதலில்

காத்திருத்தல் கடும்

தவம் என தெரியாமலே

================

உன் புன்னகைக்கு

விலையேதும் இல்லையென்றாலும்

என் புன்னகையை

ஈடாக ஏற்றுக்கொள்வாயா?

====================

மௌனம் ஒரு 

மொழியென நீ 

பெசாதபோதேல்லாம் 

அறிந்துகொண்டேன் நான்

=================

நினைத்தேன் வந்தாய்

என பொய் சொல்லமாட்டேன்

நினைக்காத போதெல்லாம்

வந்தாய்

===========================================================

Tweet

ஃப்ராடு புக்கான ஃபேஸ்புக்....இப்படியும் ஒரு நவீன சீட்டிங்.....

பத்து நாளைக்கு முன்பு நண்பருக்கு போன் செய்து பேசிக்கொண்டு இருந்தேன் .நலம் விசாரிப்புகளுக்கு பின்பு பேச்சோடு பேச்சாக செய்தி தெரியுமா பாய் என கேட்டார் .என்ன என்று கேட்டேன் .அவர் சொன்ன செய்தி என்னை மிக வியப்பில் ஆழ்த்தியது .அருவருப்பாகவும் இருந்தது .இப்படியும் இருக்கின்றாகளே மனிதர்கள் இவர்களை நாம் என்ன செய்வது? .

பேஸ்புக்கில் கொஞ்சம் நட்பு வட்டம் பெரிதாகவும் ஓரளவு படித்தவர்களுக்கு இடையில் நடந்த கதை இது .நல்ல சமூக கருத்துக்களை பதிபவர் அவர் .அவர் பதிவிடும் கருத்துக்ள் நன்றாக இருப்பதால் நண்பர்கள் வட்டம் பெரிதாக ஆகிறது .அடிக்கடி பதிவுகளுக்கு பின்னூட்டம் இடுவதால் நாளடைவில் போன் நம்பர்களை கொடுத்து பரிமாரிக்கொள்கிறார்கள்.அடிக்கடி போனில் பேசிக்கிறாங்க நண்பர்கள் அனைவரும் .இந்த நண்பரோடு சிலர் நேரில் ஒன்றாக கூடி பேசி அரட்டை அடித்து செல்கிறார்கள் .இது போல சந்தித்து பேசுவது அடிக்கடி நடக்கிறது .

இந்த நேரத்தில் இந்த நண்பரின் போனில் இருந்து ஒரு நண்பருக்கு அழைப்பு வருகிறது .நண்பர்தான் பேசுகிறார் என நினைத்து ஹலோ என சொல்கிறார் .எதிர் முனையில் பேசியதோ இவருக்கு அறிமுகம் இல்லாத பெண் குரல் .நண்பர் பதற்றம் அடைந்து நீங்க யார் என கேட்க நான் உங்க நண்பரின் மனைவிதான் பேசுறேன் என சொல்கிறார் .இந்த நண்பர் உங்க கணவர் எங்கே என கேட்க அவர் மனம் சங்கடமாக அறைக்குள் படுத்து இருக்கிறார் .அவருக்கு தெரியாமல் உங்களுக்கு போன் செய்கிறேன் என அந்த சொல்ல இவர் எதற்கு சங்கடம் என கேட்டு இருக்கிறார் .உடனே அந்த பெண் எங்கள் குழந்தைக்கு பள்ளியில் பணம் கட்ட முடியவில்லை .அதனால மனம் சங்கடப்பட்டு வீட்டிலேயே படுத்து இருக்கிறார் என்று சொல்லிவிட்டு போனில் உங்க நம்பரை பார்த்தேன் உங்களால் உதவி செய்ய முடியுமா என கேட்பதற்கு அவருக்கு தெரியாமல் போன் செய்கிறேன் .அவருக்கு தெரிந்தால் என் மீது கோபப்படுவார் என சொல்லி இருக்கிறார் .

நண்பர் அந்த பெண்ணிடம் எவ்வளவு கட்டவேண்டும் என கேட்டு இருக்கிறார் .இருபத்து ஐந்தாயிரம் என அந்த பெண் சொன்னதும் பெரிய தொகையாக இருக்கு என நினைத்துக்கொண்டு சரி பள்ளிக்கு கட்டதானே கேட்க்குறீங்க என கேட்டு இருக்கின்றார் .ஆமாம் என சொன்னவுடன் நண்பர் எந்த பள்ளி என கேட்டதற்கு அந்த பெண் ஒரு பள்ளியை சொல்லி இருக்கின்றார் .சரி நான் நாளைக்கு பணம் வாங்கிக்கொண்டு அந்த பள்ளிக்கு வருகிறேன் நீங்களும் வந்துவிடுங்க கட்டுவோம் என சொன்னதுக்கு பள்ளிக்கு நீங்க வரவேண்டாம் யாரவது பார்த்தால் தவறாக நினைப்பார்கள் என சொல்லி இருக்கின்றார் .சரி நான் உள்ளே வரவில்லை பள்ளிக்கு வெளியில் வைத்து பணம் தருகிறேன் நீங்க உள்ளே போய் கட்டிவிட்டு வாருங்கள் என சொன்னதுக்கும் வேண்டாம் நீங்க வெளியில் வேறு எங்காவது வைத்து கொடுங்கள் என சொல்லி இருக்கிறார் .சரி நான் நாளைக்கு பணம் வந்தவுடன் போன் செய்கிறேன் என சொல்லிவிட்டு இணைப்பை துண்டித்துவிட்டார்.

நண்பர் அலைபேசியை துண்டித்தவுடன் தனது வேறு ஒரு நண்பருக்கு போன் செய்து நடந்த விசயத்தை சொல்லி இருக்கிறார் .அங்கே அவருக்கு நண்பர் ஒரு அதிர்ச்சியான விசயத்தை சொல்லி இருக்கிறார் .அவங்க எனக்கும் போன் செய்து பணம் கேட்டாங்க .என்னிடம் இப்ப இல்லை ஒரு வாரம் சென்று தருகிறேன் என சொன்னேன் என்று சொல்லி இருக்கிறார் .இருவருக்கும் சிறிது சந்தேகம் .பள்ளிகூடத்துக்கு பணம் கட்டனும் என்று சொல்வது பொய்யாக இருக்குமோ என சந்தேகப்பட்டு அந்த பள்ளியில் போய் விசாரித்து இருக்கின்றார்கள் .அவங்க ஏற்க்கனவே எல்லா பணத்தையும் கட்டிமுடித்துவிட்டார்களே என பள்ளியில் சொன்னதும் இரண்டுபேரும் திரும்பிவிட்டனர் .இனிமேல்தான் இருவருக்கும் அதிர்ச்சி ஒன்று காத்து இருக்கு என்பது அறியாமலே வந்துவிட்டனர் .

முதல் நண்பர் அந்த பெண் பணம் கேட்டதை யார் என சொல்லாமல் நடந்த கதையை ஸ்டேட்டஸ் ஆக தனது முகப்பில் பதிந்து இருக்கின்றார் .அங்கே தான் நிறைய உண்மை வெளிச்சத்துக்கு வந்தது  மியுட்சுவல் நண்பர்களாக உள்ள கிட்டத்தட்ட பதினைத்து பேர் இதே பெண்ணிடம் இருப்பத்து ஐந்தாயிரம் ருபாய் குழந்தை படிப்புக்காக கொடுத்துள்ளார்கள் .எல்லோரிடமும் ஒரே கதைதான் .கணவருக்கு தெரியாமல் போன் செய்கிறேன் என .மூன்று லட்ச ரூபாய்க்கு மேல் வசூல் செய்து இருக்கின்றார்கள் .கணவன் சொல்லிகொடுத்தபடி மனைவி பேசி பணம் வாங்கி இருக்கிறார் .ஸ்டேட்டஸ் பின்னூட்டத்தில் எல்லோரும் கொட்டி தீர்த்துவிட்டனர் .

சமூக ஊடகத்தில் சமூக அக்கறை உள்ளவனாக பதிவுகள் போட்டு நல்ல பெயரோடு இருக்கும் ஒருவர் தனது மனைவியின் மூலம் நாடகம் ஆடி நம்பிக்கைக்கு உரிய நண்பர்களிடம் மோசடி செய்ய எப்படி மனது வந்தது என தெரியவில்லை .இதை இங்கே எழுதிய காரணம் நம்மை நம்பிக்கைக்கு உள்ளாக்கி நம்மையே மோசடி செய்யவும் நண்பன் என்ற பெயரில் சிலர் கிளம்பி இருப்பதால் எழுதினேன் .எல்லோரிடமும் உங்கள் உண்மைகளை கொட்டி தீர்க்காதீர்கள்

Tweet

நீயா நானா கோபியும், இளையராஜாவும்.............

இன்று நேற்றைய நீயா நானா பார்த்தேன் .நீங்களும் பார்த்து இருக்ககூடும் .சில நாட்களாக கோபி மீது எரிச்சலாகி நீயா நானா பார்ப்பதையே தவிர்த்து வந்து இருந்தேன் .இந்த நிகழ்ச்சியை நடத்தும்போது அதிகபட்ச இடையூறு எதையும் செய்யாமல் வழிநடத்தினார் .

நிகழ்வில் கலந்துகொண்டோர் ஏறக்குறைய நாற்ப்பது வயதை கடந்தவர்கள் .எல்லோரும் மிக சிறப்பாக தங்கள் பங்களிப்பை செய்தனர் .அவர்கள் எல்லோருக்குள்ளும் காலங்கள் கடந்தும் பாடல்களால் தங்கள் இளமை காலங்களை மீட்டெடுத்து பாடல்கள் வழியாக பேசியது அவ்வளவு அருமையாக இருந்தது .

முன்பு ஒவ்வொருவர் வாழ்க்கையிலும் பாடல்கள் ஏதோ ஒரு வகையில் கலந்து இருந்ததை உணரமுடிந்தது .நானும் நாற்பதுகளில் இருந்தாலும் இந்த அனுபவங்கள் எனக்கும் இருந்தது .இங்கே அதை பற்றி ஒரு நோட்சே எழுதி இருக்கிறேன் .அது ஆனந்தவிகடனிலும் வந்தது .

கலந்துகொண்டவர்கள் தங்களை மறந்து பாடியபோது அது உணர்வுபூர்வமாக இருந்தது .அதை பார்த்த எனக்கும்கூட சந்தோசம் ஒட்டிக்கொண்டது .

அவர்கள் பாடிய பாடல்களை கேட்டபோது எனக்கு ஆச்சரியம் தாங்க முடியவில்லை .அந்த பாடல்களில் முக்கால்வாசி பாடல்களை நான் இங்கே முன்பு எடுத்து பகிர்ந்து இருக்கிறேன் .

இரண்டுநாட்களாக ஏதோ ஒருவகையில் மனசுமையில் இருந்த நான் இந்த நிகழ்ச்சி பார்த்தபோது என்னை மறந்து இருந்தேன் என்பது மட்டும் நிஜம்.

பார்க்காதவர்கள் நிச்சயம் பாருங்கள்

Neeya Naana part 2 by dm_500682663e770

Neeya Naana part 3 by dm_500682663e770

Neeya Naana part 4 by dm_500682663e770

Neeya Naana part 5 by dm_500682663e770

Neeya Naana part 6 by dm_500682663e770

Tweet

இரண்டாவது தேனிலவு

இரண்டாவது தேனிலவு என மலேசியாவில் தமிழ் தினசரியில் வெளியான செய்தியைப்பார்துவிட்டு அதை படித்து பார்த்தேன் .இன்றைய நிலையில் எல்லா நாடுகளிலும் பரீட்சித்துப் பார்கவேண்டிய  நிகழ்வாய் படுகிறது எனக்கு  .

மலேசியாவில் ஒரு மாநிலத்தில் இந்த வருடத்தின் ஆரம்பத்தில் இருந்து இந்த இரண்டாவது தேனிலவு திட்டத்தை செயல்படுத்தி பார்த்து இருக்கிறார்கள் .அதற்க்கு நல்ல பலனும் கிடைத்து இருக்கிறது .

செய்தி இதுதான் .மலேசியா குடும்பநல கோர்ட்டிற்கு வந்த விவகாரத்து வழக்குகளுக்கு அவர்கள் முயற்சித்து பார்த்ததுதான் இந்த இரண்டாவது தேனிலவு திட்டம் .விவகாரத்துகோரி வந்தவர்கள் அனைவருமே திருமணம் முடிந்து ஐந்து வருடங்களுக்குள் ஆனாவர்களே அதிகம் .இப்படி வரும் வழக்குளுக்கு பெரும்பாலும் ஒரு வருடம் வரைக்கும் டைம் கொடுப்பார்கள் .அதன் பின்பும் சரிவரவில்லை எனில் விவகாரத்து வழங்கி விடுவார்கள் .ஒரு வருடம் டைம் கொடுத்தபோதும் கணவனும் மனைவியும் சேர்ந்தும் இருப்பதில்லை .தங்கள் ஈகோவை விட்டுக்கொடுக்க தயாராகவும் இருப்பதில்லை எப்பொழுதுமே .

இப்படி பிரிந்து வாழ்பவர்கள் விவகாரத்து கேட்டுவரும்போது அவர்களுக்கு ஒரு உண்மை தெரிந்தது .அனைவருமே திருமணம் ஆகி ஐந்து வருடங்களுக்குள் ஆனவர்கள் .இவர்களுக்கு கவுன்சிலிங் வழங்குவதை விட வேறு வகையில் முயற்சித்து பார்ப்போம் என அரசு செலவிலேயே முயற்சித்து பார்த்தது ரெண்டாவது தேனிலவு திட்டம் .விவகாரத்து கேட்டு வந்த கணவன் மனைவி இருவரையும் அழைத்து பேசி ஐந்து நாட்களுக்கு சுற்றுலாதளமும் அங்கே இருக்கும் உயர்தர ஹோட்டலில் தங்குவதற்கு அனைத்து வசதிகளையும் மற்றும் பணமும் கொடுத்து அனுப்பி வைத்து இருக்கின்றனர் .இவ்வாறு இரண்டாவது தேனிலவு திட்டத்தில் அனுப்பிய தம்பதியரில் இருநூற்றி எழுபத்து எட்டு தம்பதியர் மீண்டும் இணைந்து வாழ சம்மதித்து தங்கள் விவகாரத்து வழக்கை மீட்டுக்கொண்டு உள்ளனர் .இப்பொழுது இந்த திட்டத்தை மற்ற மாநிலங்களுக்கும் படிப்படியாக விரிவுபடுத்தும் முயற்சியை எடுத்து உள்ளார்கள் .

கணவன் மனைவிக்குள் ஏற்ப்படும் பிரச்சினைகளை நீதிமன்றங்களுக்கு செல்வதைவிட இருவரும் அமர்ந்து பேசி தங்களுக்குள் என்ன குறை என்பதை களைந்து இருந்தார்கள் என்றால் எந்த நீதிமன்றங்களும் பஞ்சாயத்தும் அவசியமே இல்லை .

இன்று அதிகமாக விவகாரத்து செய்பவர்கள் காதலித்து மனந்தவர்களே .இதிலும் நகர பின்னணியில் வாழ்பவர்கள் அதிகமாக விவகாரத்து வழக்கு போடுகிறார்கள் .காதலிக்கும்போது தங்கள் குறைகளை பேசி எப்பொழுதும் காதலிப்பதில்லை .தங்கள் நிறைகளை முன்வைத்தே எப்பொழுதும் காதலிப்பார்கள் .கல்யாணம் முடிந்தவுடன் ஒருத்தர் குணம் ஒருவருக்கு ஒவ்வொன்றாக தெரியவரும் .இருவரும் சண்டை இடவேண்டியது நீ என்னை ஏமாற்றி விட்டாய் என .இருவருக்குள்ளும் உள்ள குறைகள் தெரியவரும்போது தங்களுக்குள்ளே மனம் விட்டு பேச ஆரம்பித்து இருந்தார்கள் என்றால் எந்தவித பிரச்சினைகள் இன்றி வாழ்க்கை சக்கரம் ஓடிக்கொண்டு இருக்கும் .என்று இருவருக்குள்ளும் ஈகோ தலைதூக்க அனுமதிக்கிறார்களோ அன்றே அவர்கள் தங்கள் வாழ்க்கையை இழக்க ஆரம்பித்து விடுகிறார்கள் .

இந்த இரண்டாவது தேனிலவு திட்டம் இந்தியாவின் பெருநகரங்களுக்கு இன்று அவசியாமான திட்டம் .பிரிந்து வாழும் தம்பதியரை   தங்கள் மனசு விட்டுபேச ஒரு சந்தர்ப்பம் அமைத்து தருவது இன்றைய நிலையில் அவசியமாகிறது .யாரோ மத்தியஸ்தம் அல்லது நீதிமன்றங்களில் பேசி  தீர்ப்பதை விட சம்மந்தப்பட்ட இருவரே பேசவும் தனிமையும் ஏற்ப்படுதிகொடுக்கும்போது நிச்சயம் நல்ல பலனை தரும்

Tweet

உலக தொலைகாட்சிகளில் முதன்முறையாக

தலைப்பு பார்த்துட்டு என்ன யோசிக்கிறீங்க .மேலே படிங்க கொஞ்சம் செய்தி இருக்கு .நான் இங்கே சொல்லப்போற செய்தி யாரேனும் பதிவிட்டு கூட இருக்கலாம் .இருந்தாலும் நானும் எழுதவேண்டியதாக இருக்கிறது .

சென்றவார ஜூனியர் விகடனை வாசித்து கொண்டு இருந்தேன் .அதில் ஒரு செய்தி எங்க அப்பா மூணு கொலை செய்து புதைத்துவிட்டார் என .செய்தியை படித்து முடித்துவிட்டு கொஞ்சம் நேரம் அமைதியாக அதே நேரம் சிந்தனை வயப்பட்டவனாக அமர்ந்துவிட்டேன் .

சதீஷ் ,பார்கவி இவர்கள் காதலர்கள் .இவர்கள்  காதலர்களை சேர்த்துவைக்கும் தனியார் தொலைகாட்சி  நிகழ்வில் கலந்து இருக்கின்றார்கள் .அங்கே பார்கவியின் அப்பாவும் நிகழ்ச்சியில் கலந்துகொண்டு இருக்கிறார் .பார்கவி தன் அப்பாவோடு செல்லமாட்டேன் என கூறி அவர் மூன்று கொலைகள் செய்து புதைத்தவர் என சொல்லி இருக்கிறார் .

இந்த நிகழ்ச்சி ஒளிபரப்பான பிறகு அதை பார்த்த ஜீவா என்ற பெண்மணி கொலையானது தனது கணவரும் ,மகளும் ,மருமகனுமாக இருக்கலாம் என போலீசில் புகார் செய்து இப்பொழுது விசாரணை நடப்பதாக எழுதி உள்ளார்கள் .

என் கேள்வி தொலைகாட்சி நேர்மை பற்றி .ஒரு நிகழ்வு தொலைகாட்சியில் ஒளிபரப்படும் முன்பு பதிவு செய்யப்படுகிறது .அது ஒருவாரமா அல்லது இரண்டு வாரம் கழித்தோ ஒளிபரப்படும் .நிகழ்ச்சி பதிவு செய்யப்படும்போது அதில் கலந்துகொண்டு இருக்கும் ஒரு நபர் கொலையாளி என பெற்ற மகள் சொன்னபோது தொலைக்காட்சியினர் போலீசில் புகார் செய்து இருக்கவேண்டாமா .

நிகழ்ச்சி ஒளிபரப்பாகி அதை பார்த்து பாதிக்கப்பட்ட பெண் போலீசில் போய் புகார் கொடுக்கும் வரை அந்த கொலையாளி சுதந்திரமாகவே இருந்துள்ளார் .ஒளிபரப்பட்ட உடனே பொதுமக்களோ அல்லது போலீசோ ஏன் விரைவான நடவடிக்கையில் இறங்கவில்லை .

கணவன் மகள் மருமகன் என மூன்று நபர்கள் காணமல் போனபோதும் அந்த பெண்மணி ஏன் போலீசில் புகார் செய்யவில்லை .தன் அப்பா கொலை செய்தது தெரிந்தும் பார்கவியால் எப்படி ஒரே வீட்டில் நான்கு வருடங்கள் இருக்க முடிந்தது .அடுக்கடுக்காக கேள்விகள் கேக்கலாம் .

இனி வரும்காலங்களில் இப்படி தொலைக்காட்சியினர் விளம்பரம் செய்தாலும் செய்வர் .

உலக தொலைகாட்சிகளில் முதன் முறையாக கொலைசெய்த சிலமணி நேரங்களே ஆன கொலையாளி எங்கள் தொலைகாட்சியில் தோன்றுவார் .

உலக தொலைகாட்சியில் முதன் முறையாக கொலை செய்வதை நேரடி ஒளிபரப்பு எங்கள் தொலைகாட்சியில் மட்டுமே .

உலக தொலைகாட்சியில் முதன்முறையாக வீடு புகுந்து இளம்பெண்ணை கற்பழிக்கும் காட்சி எங்கள் தொலைகாட்சியில் மட்டுமே .

வன்மம் நிறைந்து காணப்படுகிறது இன்றைய தொலைகாட்சி நிகழ்ச்சிகள் .தொடர் நாடகங்கள்தான் சமூக சீர்கேடுகளை உருவாக்கிக்கொண்டு இருக்கிறது என பார்த்தல் ரியாலிட்டி நிகழ்ச்சிகளும் அதை தாண்டி ரேட்டிங் வாங்குவதற்காக வீட்டிற்குள் அத்தனை சீர்கேடுகளையும் அடுப்பங்கரைக்குள் கொண்டுவந்து விடும் போலருக்கு

Tweet

அரசியல்வாதிகள் ''ஙே''ன்னு விழி பிதுங்கும் வாரம்.....

”ஙே” என்ற இந்த வார்த்தைக்கு அர்த்தம் குமுதம் அரசு பதில்களிலும் ,எழுத்தாளர் ராஜேந்திரகுமார் நாவல்களில் மட்டுமே அறிந்து இருக்கின்றேன் .மற்றபடி ஙே எனும் வார்த்தைக்கு உண்மையில் அர்த்தம் இருக்கிறதா என்பது தெரியாமல்தான் இதுவரை இருந்து வந்தேன் .ஆனால் கடந்த ஒரு வாரமா அவ்ளோ ஞே க்களை பார்த்து வருகிறேன் இந்த ஜனாதிபதி தேர்தல் மூலம் .

முதல் ஙே ஒய்வு எடுக்குறதுக்கே புது அர்த்தம் கண்டுபிடித்த செல்வி ஜெயலலிதா .எழுதி குடுக்குறத அர்த்தம் தெரியாமே அப்படி வாசித்து செல்லும் ஜெயலலிதாவுக்கு நான் கை காட்டுற ஆளுதான் இந்த தடவை ஜனாதிபதி என மிதமிஞ்சிய நம்பிக்கையில் சங்கு ஊதப்பட்டுவிடுவார் என தெரியாமல் சங்மாவுக்கு அதரவு சொல்லி முதல் ஆளாக ஙே என விழித்துக்கொண்டு இருக்கிறார் .

அப்புறம் இந்த மம்தா பானர்ஜி .இவருக்கு கொஞ்சம் மனதுக்குள் இரும்பு பெண்மணி மார்கரெட் தாட்சர் என நினைப்பு .கொஞ்சம் ஓரக்கண்ணில் பிரதமர் பதவிக்கும் ஆசை துளிர்விட்டு இருக்கும்போல .தான் இந்தியாவின் அசைக்கமுடியாத சக்தி என நிரூபிக்க ஆசை .பலிகடா அப்துல் கலாம் .கலாம் பாட்டுக்கு அறிவியல் கருத்தரங்கு என கல்லூரிகளுக்கு பயணம் செய்துகொண்டு இருந்தவரை நீங்க மறுபடியும் வந்து ரப்பர் ஸ்டாம்ப் பதவியில் உக்காருங்க என அழைத்துவிட்டு இன்னைக்கு ஙேஎன விழிபிதுங்கி நிக்கிறார் .

அடுத்து ஙே பா ஜ க எனும் தேசிய கட்சி மொத்தமும் .பிரதமர் பதவிக்கு யாரை முன்மொழிவது என இப்பவே சண்டை போட உல் கட்ட்சியிலே ஆளுக்கு ஒரு பிரிவாக இருக்கும்போது ஜனாதிபதி தேர்தலில் மட்டும் என்ன ஒற்றுமையா இருந்துருவாங்களா என்ன? .முதலில் சங்மா ஆதரவு கேட்டவுடன் ஜெயலலிதாவே ஆதரிக்கும்போது நாம ஆதரிக்கலாம் என நினைக்கும்போதே மம்தா அப்துல்கலாமை நிற்கவைப்போம் என அறிக்கை வருது .தேள் கொட்டுனவன் உடம்புபோல ஆகிடுச்சு பா ஜ க கட்சிக்கு .நாமதானே அப்துல்கலாமுக்கு மொத்த ஏஜன்ட் ,இந்த அம்மா என்ன இப்ப வந்து அந்த உரிமையை கையில் எடுக்குதே என இவங்களும் அப்துல் கலாமுக்கு ஆதரவு தெரிவித்து இப்ப ஙே என விழி பிதுங்கி நிக்கிறாங்க .மறுபடியும் சங்மா வுக்கு சங்கு ஊத பாஜக காவடி எடுப்பாங்க போல .

அடுத்து கலைஞர் ஆரம்பத்தில் சொன்ன பதிலோடு நின்று இருக்கலாம் .மத்தியஅரசு நிற்க வைக்கும் வேட்பாளருக்கு எங்கள் ஆதரவு என சொன்ன பின்னாடி எதற்கு கலாம் என்றால் கலகம் என சொல்லணும் .ஏற்கனவே தமிழ் போராளிகள் எல்லோரும் எப்படா அய்யா வாய தொறப்பாரு நாம ஸ்டேட்டஸ் போட்டு கிழிக்கலாம் கொஞ்சம் தமிழன் என நிரூபிக்கலாம் என காத்திருக்கும்போது இப்படி பேசுனா சும்மா இருப்பாங்களா? .ஒருநாள் பொழுது அவங்களுக்கு ஓடிடுச்சு .கலைஞர் தான் தப்பா சொல்லிட்டோமோ என ஙே என விழி பிதுங்கி நிக்கிறார் .

இருபது இருபது என எல்லா இளைஞன் மனதிலும் விதைத்தவருக்கு சொந்தகாரரனா அப்துல்கலாம் .ஜனாதிபதியாக இருந்தபோது சில மரபுகளை உடைத்தவர்தான் .ஆனால் சில நேரங்களில் பேசவேண்டியது இருக்கும்போது மௌனமாகவும் இருந்தவர் .இவர் மனதிலும் இன்னும் கொஞ்சம் ஜனாதிபதி பதவிமேல் ஆசை இருந்து இருக்கும்போல .மம்தா பேரை அறிவித்த உடனே மறுத்து அறிக்கை விட்டு இருப்பாரேயானால் இன்று இன்னும் எல்லோர் மனதிலும் உயர்ந்து இருப்பார் .ஆனால் தாம் நின்றால் எல்லோரும் ஆதரிக்கும் சூழ்நிலை இல்லை என்று தெரிந்தபின்னால் நான் போட்டியிடவில்லை என சொல்லி ஙே என இவரும் விழி பிதுங்கி நிற்கிறார் .

மொத்தத்தில் கேலிகூத்து நடத்துவதில் யாரும் சளைத்தவரல் இல்லை என்பதை இந்த ஜனாதிபதி தேர்தலில் நிரூபித்து எல்லோரும் ஙே என விழிபிதுங்கி நிற்கின்றனர்

Tweet

என் மலரும் நினைவுகள்.......

என் கல்யாணத்தின்போது அனைத்து வேலைகளையும் நானே செய்தேன் .என் அண்ணனுக்கும் எனக்கும் மூன்று நாள் இடைவெளியில் கல்யாணம் நடந்தது .என் அண்ணன் கல்யாணத்திற்கு பத்து நாளைக்கு முன்புதான் ஊருக்கு வந்தார் .அதனால் ஏறக்குறைய அனைத்து வேலைகளையும் நானே செய்தேன் .

அப்படி இருக்கும்போது எனது தந்தை என்னை கூப்பிட்டு உன் கல்யாணத்தன்று பாட்டுக்கச்சேரி ஏற்பாடு செய் என சொல்லிவிட்டார் .அண்ணனுக்கு வெளியூர் பொண்ணு ,எனக்கு உள்ளூர் பொண்ணு .அண்ணன் வரவேற்பும் ,அன்றே எனக்கு திருமணமும் என ஏற்பாடு செய்யப்பட்டு இருந்தது .

கல்யாண வீடுகளில் டெக்கரேஷன் செய்வது அப்பொழுதுதான் ஆரம்பம் ஆகி இருந்த நேரம் .அப்ப அறந்தாங்கியில் சுபால் டெக்கரேஷன் என ஒருவர் நடத்திக்கொண்டு இருந்தார் .அவர் மதுரையை சேர்ந்தவர் .அவரிடம் சொல்லிக்கொண்டு இருந்தேன் பாட்டுக்கச்சேரி வைக்கணும் என .அவர் மதுரையில் எனக்கு தெரிந்த நிறைய குருப் இருக்கு வாங்க போய் பேசிவிட்டு வருவோம் என சொன்னார் .நானும் அவருடன் மதுரைக்கு கச்சேரி புக் செய்ய சென்றேன் .

நாங்க மதுரையில் அப்பொழுது பிரபலமாக இருந்த ஒயிட் ரோஸ் என்ற குருப்பை போய் பார்த்தோம் .அவர்கள் எங்களிடம் சொன்னார்கள் எங்கள் குருப் மட்டும் வந்தால் ஒரு ரேட்.இங்கே நெல்லை பிரபாகர் என்பவர் மிக பிரபலம் அவரை அழைத்து வந்தால் கூடுதல் தொகை என சொன்னார்கள் .அவர் பாடிய விடியோவையும் போட்டு காட்டினார்கள் .எஸ் பி பாலசுப்ரமணியம் குரலை நகல் எடுத்து இருந்தது அவர் குரல் .எனக்கும் மிக பிடித்து விட்டது .அட்வான்ஸ் கொடுத்து புக் செய்துவிட்டேன் .

ஊருக்கு வந்து நெல்லை பிரபாகர் கலக்கும் மதுரை ஒயிட் ரோஸ் இன்னிசை குழுவினரின் இசைக்கச்சேரி நடைபெறும் என நோட்டிஸ் அடித்து எங்கும் ஒட்ட சொல்லிவிட்டேன் .

கல்யாணத்தன்று இரவு இசைக்குழுவும் வந்து மேடையில் ஆர்கெஸ்ட்ரா பொருட்களை சரி செய்துகொண்டு இருந்தார்கள் .நல்லகூட்டம் கூடி விட்டது .எனக்கு ஊரில் நண்பர்கள் வட்டமும் கொஞ்சம் பெரியது .எல்லோரும் வந்துவிட்டார்கள் .சரியாக ஒன்பது மணிக்கு கச்சேரி ஆரம்பம் ஆனது .முதலில் இஸ்லாமிய பாடல்கள் பாடினார்கள்

.அனால் மேடையில் நெல்லை பிரபாகரோ,பெண் பாடகியோ யாரும் இல்லை .இரண்டு மூன்று பாடல்கள் முடிந்தபின்பு வருவார்கள் என பார்த்தோம் .மூன்று பாடல் முடிந்த பின்பும் நெல்லை பிரபாகர் வரவில்லை .நான்காவது பாடலுக்கு இரண்டு நபர்கள் மைக்கை பிடித்து தயாராக இருந்தார்கள் .இசை ஆரம்பம் ஆகி பாட ஆரம்பித்தார்கள் .என் முகம் போனபோக்கை இன்று பார்த்தாலும் சொல்ல வார்த்தை இருக்காது .அந்த இருவரில் ஒரு ஆண் பெண் குரலில் பாடினார் .என் நண்பர்கள் எல்லோரும் என்னை கேலி செய்தே நோகடித்து விட்டனர் .நெல்லை பிரபாகரும் வரவில்லை .பெண் பாடகியும் வரவில்லை .இன்று வரைக்கும் என் நண்பர்கள் அந்த கச்சேரியை சொல்லி சிரிப்பார்கள் .

நெல்லை நண்பர்களே இன்னும் அந்த நெல்லை பிரபாகர் பாடிக்கொண்டு இருக்கின்றாரா .

மதுரை நண்பர்களே இன்னும் அந்த ஒயிட் ரோஸ் இசைக்குழு இயங்கிக்கொண்டு இருக்கிறதா

Tweet

கனவுகள்தானோ வாழ்க்கை எல்லாம்..

"அம்மா போன் அடிக்குதும்மா" செல்வி சத்தம்போட்டு அம்மாவை கூப்பிட்டாள்.

“எடுத்து யாருன்னு கேளும்மா” .

”ஹலோ யாரு பேசுறது?” .

”நான் அண்ணன் பேசுறேன் செல்வி”

.

”நல்லா இருக்கியா அண்ணே?” .

”நான் நல்லா இருக்கேம்மா ,நீ அம்மா அப்பா எல்லாம் எப்படி இருக்கீங்க?”

”எல்லோரும் நல்லா இருக்கோம்ணே ,அம்மாவை கூப்பிடவா ,

கூப்பிடுமா” .

செல்வியிடமிருந்து அம்மா போனை வாங்கினாள்.

”ஹலோ சேகரு நல்லா இருக்கியாய்யா?”

”நல்லா இருக்கேம்மா ,நீங்க அப்பா தங்கச்சி எல்லோரூம் நல்லா இருக்கீங்களா ,அப்பா எங்கேம்மா?” .

”எல்லோரும் நல்லா இருக்கோம் சேகரு .அப்பா வயக்காட்டுக்கு போயிருக்காங்க”

”சரிம்மா ,செல்விக்கு மாப்பிள்ளை வந்துச்சே என்னம்மா சொன்னாங்க” .

”புடிச்சு இருக்குன்னு சொன்னாங்க சேகரு .நம்ம குடும்பத்தில் எல்லோருக்கும் மாப்பிள்ளைய புடிச்சு இருக்கு .மாப்பிள்ளை குடும்பமும் நல்ல குடும்பம்தான்” .

”அப்புறம் என்னம்மா பேசி முடிச்சிற வேண்டியதுதானே?” .

”இல்லைப்பா கொஞ்சம் கூடுதலா செய்முறை எதிர்பார்க்குறாங்க” .

”கவலை படாதீங்கம்மா செஞ்சுறலாம்.எனக்கு இருக்குறது ஒரே தங்கச்சிதான் என்ன என்ன கேக்குறாங்களோ அவ்வளவையும் செய்வோம் பேசி முடிங்கம்மா .கொஞ்சம் பணம் இங்கே சேர்த்து வைத்து இருக்கேன் அதோடு முதலாளியிடம் கேட்டால் பணம் தருவாரு .என் முதலாளி நல்ல குணம் .கண்டிப்பா கேட்ட பணம் தருவாரு .நீங்க கல்யாணத்துக்கு ஆகவேண்டிய வேலைய பாருங்க .அப்பாவிடம் கவலைப்பட வேணாம்னு சொல்லுங்க .நானும் முடிந்தால் கல்யாணத்திற்கு வருவதற்கு முயற்சி செய்றேம்மா .

நீங்க உடம்பை கவனித்து பார்த்துக்குங்க அம்மா .போனை வைக்கவாம்மா”.

................................................................

போனை வைக்கவாம்மா ,போனை வைக்கவாம்மா ,போனை வைக்கவாம்மா .

”டேய் சேகரு எழுந்திரிடா மணி ஆறு ஆகப்போவது .சீக்கிரம் வேலைக்கு இறங்காட்டி முதலாளி கத்துவாருடா.என்னடா புலம்புறே எப்போதும்போல கனவாடா” .

”ஆமாடா கனவுதான் .சீக்கிரம் கல்யாணம் நடக்கும்னு காத்துகிட்டு இருக்குற தங்கச்சி ,ஏதாவது என்னால் நடந்துறாதா என ஏங்கும் அம்மா ,எந்நாளும் ஆஸ்பத்திரியும் வீடுமா அலையுற சீக்காளி அப்பா எல்லோருக்கும் இருக்குற ஒரே நம்பிக்கை நான் .ஆனால் நான் சம்பாரிக்கும் பணம் வாங்கிய பணத்துக்கு வட்டி கட்டவே சரியா இருக்கு .இதுல நான் என்னடா பண்ணமுடியும் .கனவுதான் காணமுடியும் .வாடா எப்போதும்போல வேலைக்கு போவோம் .இல்லாட்டி திட்டி தொலைவாரு”

Tweet

அப்பாடக்கர் எனும் அறிவாளிதமிழன்

உலக தொலைகாட்சிகளில் முதன்முறையாக என்று போடுவது போல உலக இணையதளங்களில் முதன்முறையாக என செய்திகள் போட துடிக்கும் அறிவாளி தமிழனே எதை நோக்கி சென்றுகொண்டு இருக்கிறாய் நீ .

இணைய இணைப்பையும் ,இனைய இணைப்பு உள்ள செல்பேசியயையும் கையில் வைத்துகொண்டு உலக உலாவந்து ,உள்ளூர் குட்டிசுவர் தாண்டி எல்லைகள் அற்று பேசுகின்றாய் .எல்லை என்று சொன்னது நாட்டின் எல்லைகள் அல்ல .எதை பேசுவதாக இருந்தாலும் ஒரு எல்லை வேண்டும் .ஆனால் நீ எல்லை கோட்டை மீறுதல் வேண்டும் என அடம்பிடித்து அலைந்துகொண்டு இருக்கிறாய் .

ஒவ்வொரு நாளும் உன்னை யாரேனும் கவனத்திகொண்டே இருக்கவேண்டும் என பேராசைபடுகிறாய்.ஆசைகொள்வதில் தவறு ஒன்றும் இல்லை .அர்த்தத்தோடு அந்த ஆசைகள் வேண்டாமா .

இன்று பேஸ்புக் உலகமே கொஞ்ச நேரத்தில் ஸ்தம்பித்து விட்டது .உன் மண்ணாய் போன யார் செய்திகளை முந்திதருவது என்ற ஆசையால் .யார் பக்கத்தை திறந்தாலும் பதிவுகளும் பதிவுகளை ஒட்டிய பின்னூட்டமும் ஒன்றை நோக்கியே கை நீட்டி செய்திகளை சொல்லிக்கொண்டே இருந்தன .

குஷ்பூவின் இடுப்பை கிள்ளியது உங்களுக்கு பதிவு போட்டு கும்மி அடிக்கும் நிகழ்வாக தெரிந்தது .ஏன் எனில் குஷ்பூ ஒரு நடிகை .பெரிய மார்பகங்களையும் இடுப்பையும் தொப்புளில் வளையம் மாட்டியதை மட்டுமே ரசிக்க பழகிய நமக்கு  அந்த உடம்புக்குள் உயிரும் உணர்வும் கலந்த ஒரு பெண் இருக்கிறாள் என்பதை மறந்து அருவெருப்பின் உச்சத்தையும் ஆபாசத்தையும் கலந்து எழுதுகிறாய் .

ஏன் இப்படி எழுதுகிறாய் நமக்கும் அம்மாக்கள்,அக்காக்கள் ,தங்கைகள் ,அத்தைகள் என பெண் வடிவில் உறவுகள் இருக்கிறது என சொன்னால் உள்ளே வராதே ஒதுங்கி போ என சொல்கிறாய் .எனக்கு குஷ்பூ உறவுக்காரங்க இல்லைதான் ,ஆனால் என் பார்வையில் பெண் வடிவில் அம்மாவையும் தன்னுள் ஒலித்துவைத்து இருக்கும் மனுஷி.

என்னையே திரும்ப கேட்க்கிறாய் எங்கள் குடும்ப உறவுகள் குத்தாட்டம் போடவில்லை .ஆதலால் எங்கள் குடும்ப உறவுகளை பதிவு எழுதி கும்மி அடிக்கமாட்டோம் .நீ வேண்டும் என்றால் குத்தாட்டம் ஆடச்சொல்லி எழுது என .என்ன சொல்வது உனக்கு பதில் .சினிமாக்காரி என்றால் நமக்கு கேவலமானவர்கள் .

இன்னொன்றையும் நீ எழுதுகிறாய் ரஞ்சிதா பற்றி எழுதாதவர்கள் யாரும் இருக்கின்றீர்களா என .அதுதான பிரச்சினை .செய்திகளின் வீரியம் எது என்பதை எப்பொழுது உணர ஆரம்பிப்பாய் .ரஞ்சிதாவின் செய்தி தனிப்பட்ட ஒன்று அல்ல .நித்தியானந்தாவின் ஆன்மிகம் கேள்விகுரியானபோழுது அவரையும் சேர்த்து எழுதும் அளவுக்கு தள்ளபட்டுவிட்டார் .உன் கேள்வி நியாயம் ஆனதுதான் .அன்று ரஞ்சிதா வை எழுதியது போலவே எல்லோரையும் எழுதுவேன் என சொல்ல வருகிறாயா .

அப்ப மஞ்சள் பத்திரிக்கை எழுதி பிழைப்பு நடத்துபவனுக்கும் ,நூறு லைக் ஐம்பது கமன்ட் வாங்க எழுதும் உனக்கும் என்ன வித்தியாசம் அன்பு தமிழனே .

நேற்று தான்யா எனும் நடிகையை மன உளைச்சல் கொள்ளும் அளவுக்கு தனிப்பக்கம் ஆரம்பித்து திட்டினாய் .இன்று குஷ்பூ இடுப்பு  நாளை எதை எழுதி தமிழன் என நிரூபிக்க போகிறாய் .

நான் இவ்வளவு எழுதியதால் என்னை உனக்கு திட்ட தோன்றலாம் .தாரளாமாக திட்டிக்கோள்.நான் கவலை அடையபோவதில்லை .நான் எழுதியது ஒரு தகப்பனாக ஒரு அண்ணனாக ,ஒரு தம்பியாக பெண்மையை மதிக்கும் ஒரு தோழனாக மட்டுமே இதை எழுதினேன் .

நீ நாளைய செய்திகளுக்கும் யார் முதலில் செய்திகள் தருவது என்பதற்காக உன் கணினியை எப்பொழும் போல பார்த்துக்கொண்டிரு

Tweet

சுனிதா ராணியும் பேஸ்புக் புரட்சியும்

சுனிதா ராணி பார்க்க அவ்வளவு அழகாய் இருப்பாள் .போட்டோவை ஒரு தடவை பார்க்கும்போதே ஒன்பது தடவை பார்க்க தோன்றும் அழகு .ஆண்டவன் படைப்பில் அவ்வளவு அழகாய் இருப்பாள் .நீங்க பார்த்து இருந்தால் மலைத்து இருப்பீர்கள் பேரழகி என .அவள் ஆல்பத்தில் இருந்த போட்டோக்களுக்கு அவ்வளவு பின்னூட்டம் வந்தது .நானும் கூட அந்த பெண்ணின் நண்பர் இணைப்பில் இருந்தேன் .

ஒருவாரம் போனவுடன் பேஸ்புக் முகப்பில் வேறு ஒரு பெண்ணின் புகைப்படம் இருந்தது .அந்த பெண்ணின் புகைப்படமும் சில ஷேர் செய்யப்பட்டு இருந்தது .பார்த்தவர்கள் நண்பராக இருக்கும் என எண்ணி அந்த போட்டோக்களுக்கும் பின்னூட்டம் போட்டு இருந்தனர் .நாள் ஆக ஆக நிறைய பெண்கள் அதுவும் அழகாய் இருக்கும் பெண்கள் படங்களாக ஷேர் செய்ய ஆரம்பித்தாள்.அது போல நேற்றும் நிறைய படங்கள் வெளியாக நண்பர்கள் இணைப்பில் இருக்கும் அனைவருக்கும் லேசாக சந்தேகம் வர ஆரம்பித்தது போலி முகவரி என .இன்று காலையில் இன்னும் ஐம்பது பெண்கள் படம் வெளியாகவும் பொங்கி எழுந்துவிட்டது பேஸ்புக் நண்பர்கள் கூட்டம் .

இன்று நான் பேஸ்புக் முகப்பில் விழிக்கையில் நிறைய பதிவு சுதா ராணி போலி முகவரி .உடனே கம்ப்ளைன்ட் செய்யுங்கள் என .மதியம் ஆவதற்குள் ஒரு புரட்சியே நடந்து அந்த போலி முகவரி நபர் பேஸ்புக்கில் இருந்து விரட்டி அடிக்கபட்டுள்ளார் .அந்த பன்னாடை வேறு முகவரியில் வரும் அது வேறு விஷயம் .இனி நான் விசயத்திற்கு வருகிறேன் .

ஒரு நபர் போலி முகவரியில் இருக்கிறார் என்று தெரிந்து கொந்தளித்து ஆளை விரட்டி விட்டோம் .நேற்று நீயா நானா கோபிநாத்தை புரட்டி எடுத்தோம் .நமது வீரமும் புரட்சியும் இதுதானா .எங்கே போரடவேண்டுமோ அப்பொழுது ஒன்றாக இணைத்து இருக்கோமா .கேள்வி கேட்டு பாருங்கள் இல்லையென்றே பதில் வரும் நம்மகிட்டே இருந்து .

பஸ் கட்டணத்தில் இருந்து பசுமாட்டு சாணி வரைக்கும் விலை ஏறியபோது என்ன செய்தோம் .பேஸ்புக்கில் இருந்து ப்ளாக் வரை ஆளுக்கு ஒரு பதிவை எழுதி மனநிறைவுடன் ஒதுங்கி கொண்டோம் .அரசியல் வாதி நாலு நாளைக்கு அறிக்கை விட்டு அவர்கள் வேலையை பார்க்க போய்விடுவார்கள் .நாம என்ன செஞ்சோம் .டீக்கடை பெஞ்சில் ஓசி பேப்பரையோ அல்லது நெட்ல பேசி ஓஞ்சு விடுவோம் .அது முடிஞ்சவுடனே அன்னைக்கு என்ன செய்தி முக்கியமா இருக்கோ ஆளுக்கு ஒரு பார்வையில் எழுதி நாலு கமண்டும் இருபது லைக்கும் வாங்கிட்டு அடுத்தநாள் செய்திய எப்படி எழுதலாம்னு ஓடிருவோம் .

பேஸ்புக்கில் முந்தாநாளு பெட்ரோல் விலை ஏற்றம் ,நேற்று கோபிநாத் ,இன்னைக்கு காலைல சுனிதா ராணி ,மத்தியானம் கலைஞர் பேச்சு என பதிவு போடவும் பேஸ்புக் புரட்சி பண்ணவும் தெரிந்து இருக்கு .அப்புறம் அரை லிட்டர் பெட்ரோலுக்கு அலைமோதி வாங்க தெரிந்து இருக்கே தவிர நம்மளுடைய கோபம் எங்கே போனது.

விலை ஏற்றம் வந்தபொழுது கட்சிபேதம் மறந்து மக்களை ஒன்றிணைக்க தெரிந்ததா .கரண்ட் பிரச்சினைக்கு வீட்டில் இருந்து திட்டியும் பதிவு போடதெரிந்ததே தவிர மக்களை ஒன்று திரட்டி புரட்சி செய்ய தெரிந்ததா .இப்ப பெட்ரோல் பிரச்சினை வந்த போதும் அவன் அவன் வண்டிக்கு பெட்ரோல் போட அலைவோம் தவிர அடுத்தவன் எப்படி போனா நமக்கு என்ன .

வாங்க நாம் புரட்சி பண்ணுவோம் சமூக வலைதளங்களில் மட்டும். நானும் உங்க கூடத்தான்

Tweet